ලෝක විනාශය අත ලඟද?

අකලට වැටෙන මහ වැසි, දුර්භීක්ෂ, වසංගත රෝග, සුනාමි ව්‍යසන, සුලි සුලං හා ලැව් ගිනි ශිෂ්ඨාචාරයේ නිශ්චිත නිමාවක පෙර මග ලකුණු පෙන්වයිද?

  ලෝක විනාශය අත ලඟ බවට ඉඟි කරන දේශගුණික විපර්යාස

අපේ මුතුන් මිත්තන්ගේ කාලයේ ගමේ රටේ දේශගුණික හා කාලගුණික වෙනස්වීම් සිදු වුණේ කිසියම් රටාවකට අනූවය.වැසි සහිත කාලය සහ වැසි රහිත වියලි දේශගුණය උදාවන කාලය පිලිබඳව අවබෝධයක් ඒ ඇත්තන්ට තිබුණා. අනෙක් අතට ඒ උදවිය ස්භාවික විපත් වලට මුහුණ දෙන්න කල් ඇතිවම ලකලෑස්ති වුණා. ඒ සඳහා හෝඩුවාවන් ලබා ගත්තේ සොබා දහමේ ඉඟි බිඟි වලින්මයි.

වැසි ඇද වැටෙන දිනය, වේලාව හා නැකත අනූව එම වර්ෂාවේ ස්වභාවය, පවතින කාලය හා එමගින් සිදුවිය හැකි අනතුරු ආදිය පිලිබඳ අනාවැකි ප්‍රකාශ කල හැකි 'වැහි ලකුණු ශාස්ත්‍රය' නම් සම්භාවනීය ශාස්ත්‍රීය දැනුමක් ඉපැරණි බහුශ්‍රැතයන් අතර පැවතුණි. සතුන්ගේ හැසිරීම් රටා, ස්වභාව ධර්මයේ හදිසි වෙනස් වීම් සහ පොහොය ලබන හා ගෙවෙන වෙලාවේදී පවතින දේශගුණික තත්වය වැනි දෑ පදනම් කරගෙන කාලගුණික අනාවැකි පැවසීමේ දුර දක්නා නුවණද ඔවුන් සතු විය.දේශගුණික රටා පිලිබඳ ඔවුන් එවැනි පූර්ව අවබොධයක් ලබා ගත්තේ කාලාන්තරයක් පුර මිහිපිට ජීවත් වීමෙන් ලැබූ පාරම්පරික ජීවන අත්දැකීමෙනි.

මේ අන්දමට මුතුන් මිත්තන් විසින් අත් දැකීමෙන් දැන කියාගෙන කට වචනයෙන් පරපුරෙන් පරපුරට රැගෙන ආ දේශගුණික අනාවැකි වල විශ්වාසනීයත්වය පිලිබඳව අද වන විට ගැටලු මතු වෙමින් පවතී. අස්වැන්න නෙලා ගෙට ගන්නට නියමිත පෑවිල්ල ඇතැම් විට බලාපොරොත්තු නොවන මොර සූරන මහ වැසි ඇද වැටෙන කාලයකි. ගස් කොල වල මල් ඵල දැරිය යුතු වසන්තය බොහෝ විට දීර්ඝ ඉඩෝරයකි. අනපේක්ෂිත දරුණු ස්වභාවික විපත් දේශගුණික හා කාලගුණික වෙනස්වීම් හා මාරුවීම් වල අනිවාර්ය ප්‍රතිඵලයකි.

අතීතයේ ස්වභාවික විපත්ති බොහොම දුර්ලබයි. එත් අද, වෙලාවක් කලාවක් නොමැතිව ඇද වැටෙන මහ වැසි, සුලි සුළං, ගංවතුර, නාය යෑම්, වසංගත රෝග පැතිරීම හා මහ පොලව ඉරි තලන කාෂ්ඨක නියඟ නිරන්තරයෙන් සිදු විය හැකි සුලභ සිදුවීම් ගොන්නක් බවට පත් වෙලා හමාරයි.අතීතයේදී සුලි සුළඟක්, ගංවතුරක්, නාය යෑමක් වැනි ස්වභාවික ආපදාවන් සිදු වුණ විට ඒ ගැන කවි කොල ගසා ගමේ සති පොලේ විකිනීමටද තිබිනි. නමුත් අද වන විට ස්වභාවික ආපදා හේතුවෙන් නිතර නිතර මිනිසුන්ගේ ගේ දොර , ජීවනෝපාය පවා විනාශ වීම ජන ජීවිතයේ තවත් එක් සාමාන්‍ය සිදුවීමක් වැනිය.

දේශගුණික විපර්යාසවල හදිසි බලපෑම් හේතුවෙන් මේ වන විට ලෝකයේ රටවල් බොහොමයක එදිනෙදා ජන ජීවිතය බාධා ඇති කරමින් සුලි කුණාටු, ගං වතුර, භූමි කම්පා, ලැව් ගිනි, අධික හිම පතනය, දැඩි උණුසුම, සුනාමි වැනි කාලගුණික වෙනස් වීම් නිරන්තරයෙන් සිදු වෙමින් පවතියි.මේ නිසා ජීවිත හා දේපොළ හානි පමණක් නොව මිනිස් ජීවිතය ඉදිරියට පවත්වා ගැනීමේදී අත්‍යවශ්‍ය සාධක වන ආහාර, සෞඛ්‍යය, ජීවනෝපාය මාර්ග හා ප්‍රවාහනය වැනි පහසුකම් සපුරා ගැනීමේදී නොයෙකුත් ගැටලුකාරී අවස්ථාවන්ට මුහුණ දීමට සිදුවී ඇත. එපමණක් නොව දිගින් දිගටම සිදුවන ස්වභාවික ආපදාවලින් පසුව ජන ජීවිතය නැවත නගා සිටුවීම උදෙසා රජයට මුදල් වියදම් කිරීමටද සිදුවේ. ගෝලීය ආර්ථික අවපාතකට මුහුණ දී ඇති වර්තමානයේද එවැනි තත්වයන් ධනවත් රාජ්‍යයන්ට වඩා දියුණු වෙමින් පවතින රටවල් කෙරෙහි දැඩි අහිතකර බලපෑම් එල්ල කරනු ලබයි. 

2004 වසරේදී සුමාත්‍රා දූපත් භූ කම්පනය ආශ්‍රිතව හටගත් සුනාමිය, 2005 වසරෙදී ඇමෙරිකාවේ ඇති වූ කැත්‍රීනා සුළි කුණාටුව, 2008 දී මියන්මාරයේ ඇති වුණු නර්ගීස් සුළි සුළඟ, චීනයේ සිදු වුන භූමි කම්පාව, 2009දී ඕස්ට්‍රේලියවේ හටගත් ලැව්ගිනි, 2011 ජපානය මුහුණ දුන් සුනාමිය,මෑතක පිලිපිනයේ හටගත් සුලි කුණාටු, ගං වතුර, තායිලන්තයේ හට ගෙන ඇති ගං වතුර ආදිය මෑතකදී සිදු වුණ දරුණු ස්වභාවික ආපදා සඳහා උදාහරණ වේ. 2001 වන තෙක් ශ්‍රී ලංකාවට හදිසි ස්වභාවික ආපදා තත්ව එතරම් බරපතල ලෙස නොදැනුනත් 2003, 2006, 2008 දී ඇති වූගං වතුර තත්ව‍යන් නිසා මෙරට ඉතා විශාල වශයෙන් ජීවිත හා දේපොල හානි වීම් සිදු විය.ඔක්ස්පෑම් ආයතනය විසින් නිකුත් කරන ලද වාර්තාවකට අනූව වසර 2015 වනවිට දෙශගුණික විපර්යාස හේතුවෙන් ලොවපුරා ආපදාවට පත්වන ජනගහනය 50%කින් පමණ වර්ධනය විය හැකි බවට අපේක්ෂ්තය්. එනම් වසරකට මිනිසුන් මිලියන 375ක් පමණ අගයකි. මානුෂීය ආධාර සපයන ආයතන දුර්මුඛ වන තරමටම ගං වතුර, නියඟ හා සුළි කුණාටු වැනි තත්වයන් ඉදිරියේදී වැල නොකැඩී පැමිනිය හැකි බවට එම වාර්තාවේ වැඩි දුරටත් සඳහන් වේ.

උපුටා ගන්නා ලද්දේ;

"" දේශගුණික විපර්යාස සඳහා වග කිය යුත්තෝ කවුද? ඇති හැකි අයද? නැති බරි අයද?""

    ජන තාක්ෂණ පුවත් සඟරාව, ප්‍රැක්ටිකල් ඇක්ෂන්, දකුණු ආසියාව.

    ඡායාරූ: අන්තර්ජාලයෙනි.